Cërrik – AlbNatyra zhvilloi një takim të hapur me të rinjtë e Qendrës Multifunksionale Komunitare Cërrik, me synim forcimin e bashkëpunimit, shkëmbimin e përvojave dhe përfshirjen më aktive të të rinjve në çështjet mjedisore të komunitetit.
Takimi u karakterizua nga një diskutim i hapur mes të rinjve, ku u ndanë ide mbi mënyrat se si brezi i ri mund të kontribuojë konkretisht në mbrojtjen e natyrës, evidentimin e problematikave mjedisore dhe ndërmarrjen e nismave lokale.
Një nga idetë kryesore të diskutuara ishte krijimi dhe zgjerimi i një rrjeti rinor me emrin “Miqtë e Mjedisit”, i cili synon të bashkojë të rinj nga Cërriku dhe qytete të tjera të Qarkut të Elbasanit në një strukturë vullnetare bashkëpunimi.
Rrjeti synohet të shërbejë si një hapësirë ku të rinjtë jo vetëm të marrin informacion dhe edukim mjedisor, por të përfshihen drejtpërdrejt në aktivitete konkrete si monitorimi i problematikave mjedisore, biodiversitetit dhe faunës së egër, aksione pastrimi, mbjellje dhe gjelbërim, aktivitete ndërgjegjësuese dhe nisma komunitare.
Për AlbNatyra-n, përfshirja e të rinjve është një element i rëndësishëm i punës për ruajtjen e natyrës dhe menaxhimin e qëndrueshëm të burimeve natyrore. Eksperienca e organizatës me grupet rinore në aktivitete të monitorimit të faunës së egër dhe edukimit mjedisor mund të shërbejë si bazë për krijimin e grupeve të ngjashme edhe në zona të tjera.
Në Cërrik, temat e ardhshme të bashkëpunimit mund të lidhen me ndotjen, menaxhimin e mbetjeve, mbrojtjen e ujërave, gjelbërimin, biodiversitetin dhe ndërgjegjësimin e komunitetit. Prioritetet konkrete do të përcaktohen së bashku me vetë të rinjtë, duke u bazuar në problematikat dhe nevojat e territorit.
Takimi në Cërrik ishte gjithashtu një mundësi për krijimin e lidhjeve të reja mes të rinjve të AlbNatyra-s dhe të rinjve të Qendrës Multifunksionale, duke hedhur bazat për aktivitete të përbashkëta në të ardhmen.
Synimi është që rrjeti “Miqtë e Mjedisit” të zgjerohet gradualisht edhe në Elbasan, Librazhd, Prrenjas, Gramsh dhe zona të tjera, duke krijuar grupe lokale të të rinjve që njohin territorin e tyre, evidentojnë problematikat dhe ndërmarrin iniciativa konkrete për mbrojtjen e mjedisit.
AlbNatyra beson se mbrojtja e natyrës bëhet më e qëndrueshme kur komunitetet dhe veçanërisht të rinjtë nuk janë vetëm pjesëmarrës në aktivitete, por bëhen pjesë aktive e vendimmarrjes dhe e zgjidhjeve.
“Miqtë e Mjedisit” synon pikërisht këtë: të krijojë një brez të ri të informuar, aktiv dhe të lidhur me natyrën dhe komunitetin ku jeton.
AlbNatyra – për natyrën, për komunitetin, për të ardhmen.
